History
Oklahoma City Chin Baptist Church
Caanttha a kan pe tu kan Pathian min thangtthat si ko seh!
Pathian thawng in Oklahoma City ah 2007 hrawng ah Laimi ralzam kan phan. Laimi tlawm te lawng kan si, Mirang sin, First Baptist Church ah kan rak i pum hma sa. Caan tlawmpal ah kan mah Laimi pawl cu Chin Baptist Church ti min bunh in an mah Biakinn chung lila khan hme deuh mi ah inn dang kan rak chuak. Zapi te i hrawm khawh ding mi Kawl holh kan rak hmang.
Kawl holh zong kan di a riamh khawh deuh lo caah kan mah Lai holh te hmang ding in February 21, 2010 ah Lai Baptist Church ti in minung 12 inndang kan rak chuak tthan. Caan zeimaw zat cu Apartment ah kan i pum. December 26,2010 ah Oklahoma City Chin Baptist Church tiah min thlen a si tthan. February thla 2012 kum in Zapi kan umnak he aa naih biknak Crown Height Baptist Church ah kan i pum tthan.
Bawipa nih a kan dirpi. Minung zong kan hong tam deuh i Department le Sub-committee hna an hong dir cio .2012 kum April thla in Pastor kan ngei. Bawipa lamhruainak thawng in Biakinn kan caw i, November 2014 in kan mah Biakinn te ah zalong te in Pathian min kan thangtthat kho.
Kan tlangtar cu “Nan nih cu vawlei ceunak nan si” Matthai 5:14 hi a si. 2011 thokk in Hakha Baptist Association he i pehtlai in Mission rian kan rak ttuan. 2013 cun ICBM program in (Kanpalet peng Khelawng khua) ah minung pakhat in le MMI programme in (Asho Chin Padan peng Sinlaan khua le Padan khua) ah minung pahnih in a hmun kan i tthial. Padan lei bel cu a relrem deuh lo mi a um caah 2018 cun kan kal taak tthan. A tu hi hmundang thlacam bu in kan dothlat lio a si.
Oklahoma City cu kan unau Falam, Matu, Zotung le Tiddim he cun Laimi 1000 hrawng khua kan saknak hmun a si. Mah le holh cio in Khrihfabu dang cio ah khua kan sa. Biaknak leiin (Oklahoma Christian fellowship) le vawlei lei ( Lentecelh zuamnak) in i hawikomhnak le pehtlaihnak kan ngei.
Bawipa thawng lawnglawng in nihin tiang kan dir khawhnak hi a si.
Kan i lawm!
Bawipa nih thluachuah in pe cio hna she!